Fréttir

Tveir frjálsíþróttamenn úr UFA, Bjartmar Örnuson og Bjarki Gíslason, keppa á Alþjóðlegu frjálsíþróttamóti sem haldið verður í Laugardalshöllinni 16. janúar. Fjölmargir erlendir keppendur hafa skráð sig til leiks og er búist við spennandi keppni í flestum greinum.

Bjarki Gíslason er íþróttamaður ársins 2009 hjá UFA. Hann var valinn í A-landslið Íslands í frjálsum íþróttum og fór tvisvar erlendis til keppni fyrir Íslands hönd á sl. sumri. Bjarki er fjölhæfur frjálsíþróttamaður og er stangarstökk hans aðalgrein, en hann hefur einnig verið valinn í landsliðið til keppni í langstökki og þrístökki. Einnig er hann í úrvalshópi ungmenna hjá Frjálsíþróttasambandi Íslands. Hann er langstigahæsti íþróttamaður UFA og á gildandi Íslandsmet í þremur aldurflokkum í stangarstökki, þ.e. í flokki 17-18 ára drengja, flokki 18-19 ára unglinga og flokki unglinga 20-22 ára bæði utan- og innanhúss; 4,65m innanhúss og 4,68 utanhúss. Bjarki stundar íþrótt sína af kappi og áhuga og slær aldrei slöku við. Síðast en ekki síst má nefna að Bjarki er einstaklega góður félagi,  eflir liðsandann og er fyrirmynd annara ungmenna utan vallar sem innan.