Starf UFA Eyrarskokks

Iðkendur í UFA Eyrarskokki greiða hóflegt árgjald sem veitir aðgang að fjölbreyttu starfi hópsins og skráningu í íþróttafélag innan frjálsíþróttahreyfingarinnar (FRÍ). 

Hlaupaprógram 

Innifalið í æfingagjaldinu er aðgangur að hlaupaprógrammi allt árið. Prógrammið inniheldur fjölbreyttar æfingar sem eru settar upp með það í huga að þær mæti þörfum eftirfarandi þriggja hópa:

• Byrjendur og hófsamir hlauparar: Fólk sem er að byrja að hlaupa, eða vill bara nota hlaupin til að halda sér í formi með því að hlaupa reglulega. Æfingar þessa hóps eru yfirleitt á bilinu 6–8 km á mánudögum og miðvikudögum en 8–15 km á laugardögum.
• Áhugahlauparar: Fólk sem er komið á bragðið og er nokkuð sjálfstætt með sínar æfingar. Fólk sem vill nota hlaupin til að halda sér í formi og gjarnan taka þátt í keppnishlaupum líka svo sem 5 km, 10 km og hálfmaraþoni. Sumir fyrst og fremst til gamans en aðrir til að ná fyrirfram settum markmiðum.
• Afrekshlauparar: Hópur sem er tilbúinn til að setja markið hátt. Fólk sem er komið í gott hlaupaform og vill stefna á keppni og bætingar í styttri eða lengri vegalengdum.

Hlaupaprógrammið er yfirleitt þrískipt þannig að á hverjum æfingadegi er boðið upp á þrjár mislangar/þungar æfingar. Prógrammið tekur mið af því helsta sem er á döfinni í hlaupalífinu á Norðurlandi og hjá meðlimum. Það er sett upp með það í huga að hlauparar geti nýtt það til að búa sig undir þátttöku í helstu hlaupum á okkar félagssvæði, s.s. Akureyrarhlaupi og Súlum Vertical. Ef fjölmennur hópur iðkenda (10 eða fleiri) er að stefna á sama hlaup (s.s. Laugavegshlaupið eða hlaup erlendis) er líka gert ráð fyrir því í prógrammagerðinni.

Minni hópar og einstaklingar geta líka fengið hjá yfirþjálfara eða leiðbeinendum almenn ráð um það hvaða æfingar í prógramminu henta þeirra markmiðum best. Ræðið við þjálfara/leiðbeinanda á æfingu eða sendið skilaboð.

Einnig er hægt að kaupa sérútfært prógramm fyrir ákveðin verkefni sem er þá sett upp þannig að hlauparar geta nýtt hluta af æfingum úr Eyrarskokksprógramminu en hluti æfinga eru settar upp sérstaklega fyrir hópinn/hlauparann. Yfirþjálfari veitir nánari upplýsingar varðandi fyrirkomulag og kostnað.

Hlaupaæfingar 3-4 x í viku

Fastar hlaupaæfingar eru þrisvar í viku allan ársins hring, á mánudögum og miðvikudögum kl. 17.15 og á laugardögum kl. 9.00 á sumrin en 9.30 á veturna.

Stundum er boðið upp á fjórðu æfinguna, s.s. brautaræfingu yfir sumartímann eða drillur, stutta spretti og styrk í Boganum að vetrinum.

Á öllum æfingum hópsins eru einn eða tveir leiðbeinendur sem halda utan um hópinn. Á mánudögum og miðvikudögum eru yfirleitt tveir leiðbeinendur. Annar þeirra hefur það hlutverk að fylgja byrjendum og hófsömum hlaupurum. Hann tekur á móti nýliðum og gætir þess að enginn sé einn aftastur og afskiptur. Hinn þjálfarinn fylgir vanari hlaupurum. Hann kynnir æfinguna í upphafi, stýrir upphitun og sér til þess að allir komist af stað í þá æfingu sem verið er að taka. Hann hleypur með hópnum og er á staðnum þar til allir hafa lokið sinni æfingu.

Á laugardögum er yfirleitt aðeins einn leiðbeinandi með hópnum. Hann kynnir leiðirnar sem á að hlaupa eða hugmyndir að leiðum sem hlauparar geta valið um. Hann hleypur með hópnum og sér til þess að hópurinn þétti sig allavega einu sinni eftir að lagt er af stað og hvetur fólk til að grúppa sig saman eftir því hve hratt og langt er meiningin að hlaupa svo allir hafi hlaupafélaga.

Fræðsla og félagsstarf

Einu sinni til tvisvar á ári er boðið upp á hlaupatengda fræðslu fyrir hópinn. Það getur t.d. verið fræðsla um matarræði, hlaupaþjálfun, styrktaræfingar eða meiðslaforvarnir.

Að vori og hausti er farið í hlaupferðir þar sem hlaupnar eru skemmtilegar leiðir í temmilegri fjarlægð frá Akureyri og farið í sund á eftir og út að borða. Félagið greiðir ferðakostnað fyrir þessar ferðir en þátttakendur greiða annan kostnað.

Haldin er árshátíð árlega og stundum efnt til annarra fagnaðarfunda.

Félagsmenn eru líka duglegir að taka þátt í allskonar hlaupum innan lands og utan og stundum er efnt til hópferða í tengslum við þau.

Hlaupahald

Eyrarskokkarar eru ein aðal driffjörðurin í hlaupahaldi á Akureyri. Yfir vetrarmánuðina stendur hópurinn fyrir Vetrarhlaupum sem eru alls fimm talsins og á gamlársdag er haldið Gamlárshlaup þar sem hlauparar kveðja árið með búningahlaupi. Í júlíbyrjun heldur félagið svo Akureyrarhlaup sem er eitt elsta götuhlaup landsins. Félagsmenn hafa einnig aðstoðað við undirbúning og framkvæmd fjallahlaupsins Súlur Vertical sem haldið er um verslunarmannahelgina. Það er skemmtilegt og gefandi að taka þátt í því að halda þessum viðburðum lifandi og glæða þannig hlaupalífið á Norðurlandi, því fjölbreytt almenningshlaup eru jú eitt af því sem heldur neistanum lifandi hjá flestum hlaupurum.

Gjaldskrá

Æfingaárið er frá 1. maí til 30. apríl og árgjaldið miðast við þann tíma. Ef komið er inn á öðrum tímum er greitt  hlutfallslegt gjald í samræmi við það, sjá töflu hér að neðan. Einnig er hægt að semja um að kaupa tímabundinn aðgang að hópnum, svo sem ef fólk vill aðeins æfa yfir sumartímann. Sumargjaldið er kr 12.000 og gildir út september.

Tekið er við skráningum á netfangið: ufaeyrarskokk@gmail.com einnig er hægt að fá nánari upplýsingar um hópinn og hlaupastarfið í gegnum það netfang.

Æfingagjöld greiðist inn á reikning: 0565-26-494291 kt. 490922-0160
sendið kvittun fyrir greiðslu á ufaeyrarskokk@gmail.com.