Fréttir

Síðasta vetrarhlaup vetrarins fór fram í gærmorgun og mættu 25 hlauparar til leiks. Rannveig Oddsdóttir kom fyrst í mark á 40:53 og annar í mark og fyrstur karla var Þröstur Már Pálmason. Önnur kvenna var Sigríður Einarsdóttir á 46:32 og þriðja var Ingibjörg E. Halldórsdóttir. Annar karla var Jón Friðrik Einarsson og þriðji var Einar Ingimundarson.
Að hlaupi loknu voru veitt verðlaun fyrir stigakeppni í einstaklings og liðakeppni og útdráttarverðalaun frá styrktaraðilum hlaupsins, Bjargi, Ljósgjafanum og Halldóri Ólafssyni úr og skart. Í einstaklingskeppni kvenna sigraði Rannveig Oddsdóttir með fullt hús stiga, Sigríður Einarsdóttir var önnur og Björk Sigurðardóttir þriðja. Í stigakeppni karla bar Bjartmar Örnuson sigur úr bítum með 15 stig, Þröstur Már Pálmason var annar með 14 stig og þriðji var Halldór Arinbjarnarson með 12 stig.
Þetta var í sjöunda sinn sem UFA heldur vetrarhlaup með þessum hætti og hefur þátttakan aukist ár frá ári. Í vetur tóku alls 111 einstaklingar þátt, 70 karlar og 41 kona og er það töluverð aukning frá því í fyrra.

Næstkomandi laugardag 27. mars fer síðasta vetrarhlaup vetrarins fram. Að venju hefst hlaupið við Bjarg kl. 11:00 og verður hlaupinn 10 km hringur. Að hlaupi loknu verða veitt verðlaun fyrir stigakeppni vetrarins í einstaklings og liðakeppni og dregin út útdráttarverðlaun.

 

Marsmót UFA var haldið s.l. laugardag í Boganum. Milli 70 og 80 keppendur voru mættir á svæðið og af þeim voru um 30 10 ára og yngri sem tóku þátt í sérstakri þrautabraut. Þetta er í fyrsta sinn sem boðið er uppá þrautabraut á móti hjá okkur en þá er keppt í liðum í nokkrum greinum eins og t.d. boltakasti, spretthlaupi og jafnfætis stökki. Sigurvegarar keppninnar er svo það lið sem hefur bestan samanlagðan árangur allra keppenda. Þessi keppni tók u.þ.b. klukkutíma og lukkaðist vel.

Keppni 11 ára og eldri var svo hefðbundin frjásíþróttakeppni og var gefinn kostur á fjórum greinum 60 m hlaupi, 60 m. grindahlaupi, kúluvarpi og langstökki. Greinarnar gengu vel og örugglega fyrir sig og þökkum við starfsfólki kærlega fyrir vel unnin störf. Keppendur og fylgifiskar þeirra fá einnig kærar þakkir fyrir þátttökuna og sérstaklega var gaman að sjá keppendur úr öðrum landshlutum.

Ekki voru veitt verðlaun fyrir árangur á mótinu en allir keppendur fengu þátttökuverðlaun og þökkum við MS og Borgarbíói stuðninginn.