Fréttir

Kolbeinn Höður Gunnarsson er nú kominn til Lille í Frakklandi þar sem hann mun keppa í 200m hlaupi á Heimsmeistaramóti 17ára og yngri sem fram fer 6.-10.júlí. Kolbeinn náði lágmarki í 200m hlaupi og mun keppa fyrir Íslands hönd ásamt þremur öðrum ungmennum frá Íslandi. Kolbeinn keppir í undanrásum á föstudaginn, 8.júlí en síðan er keppni í undanúrslitum á laugardaginn og úrslitakeppnin fer fram á sunnudaginn. Það verður fróðlegt og spennandi að sjá hvernig Kolbeini gengur á sínu fyrsta stórmóti erlendis. Íslensku keppendurnir flugu út í dag ásamt fararstjórum og þjálfara. Til hamingju Kolbeinn með þennan árangur og gangi þér vel! Heimasíða mótsins er: http://www.iaaf.org/wic11/index.html

Akureyrarhlaup Íslenskra verðbréfa fór fram í gærkvöldi og voru þátttakendur 130, sem er heldur meira en undanfarin ár.

Í 5 km hlaupi kom Ásdís Káradóttir fyrst í mark á 22:29, önnur kvenna var Brynja Björg Bragadóttir og þriðja var Líney Elíasdóttir. Annar í mark og fyrstur karla var Einar Ingimundarson á 22:47, í öðru sæti í karlaflokki var Vilhelm Ottó Biering Ottósson, sem er aðeins 9 ára gamall, á 23:13 og þriðji var bróðir hans Hermann Biering Ottósson á 24:04.

Í 10 km hlaupi kom Stefán Viðar Sigtryggsson á 35:33, annar karla var Helgi Sigurðsson á 39:33 og þriðji var Arnar Aðalgeirsson á 39:49. Önnur í mark í 10 km hlaupi og fyrst kvenna var Rannveig Oddsdóttir á 39:03, önnur kvenna var Birna Björnsdóttir á 41:45 og þriðja var Sonja Sif Jóhannsdóttir á 44:50.

Í hálfmaraþoni kom Geir Jóhannsson fyrstur í mark á 1:29:59, annar var Sigurður Ingvarsson á 1:30:03 og þriðji var Þröstur Már Pálmason á 1:34:56. Fast á hæla honum kom fyrsta konan Sigríður Einarsdóttir á 1:35:14, önnur kvenna var Gunnhildur H. Georgsdóttir á 1:45:54 og þriðja var Ingibjörg Halldórsdóttir á 1:51:44.

Sigurvegarar í öllum vegalengdum hlutu vegleg verðlaun frá Sportveri/Asics, Líkamsræktarstöðinni Átaki og Strikinu.

Hér má sjá tíma allra sem hlupu.

Bjarki Gíslason setti nýtt unglingamet í stangarstökki í kvöld, þegar hann stökk 4,90m á innanfélagsmóti hjá ÍR. Eldra metið, sem var 4,80m átti Bjarki ásamt Einari Daða Lárussyni, en yfir þá hæð stökk Bjarki í Evrópubikarkeppninni fyrr í mánuðinum.