Fréttir

47. Bikarkeppni FRÍ verður haldin á Þórsvelli á Akureyri um helgina. Keppni hefst kl. 18.00 föstudaginn 24. ágúst og stendur til kl. 20.00. Laugardaginn 25. ágúst hefst keppni kl. 11.00 og stendur til kl. 15.00. Reikna má með því að flest besta og efnilegasta frjálsíþróttafólk landsins mætist í þessari keppni. Hér er því einstakt tækifæri til að sjá það í keppni.

Sigríður Björg Einarsdóttir langhlaupari úr UFA var fyrst Íslenskra kvenna í mark í Reykjavíkurmaraþoni og er því íslandsmeistari í heilu maraþoni 2012. Sigríður hljóp á tímanum 3:25:46.

Rannveig Oddsdóttir náði einnig á verðlaunapall, en hún var önnur kvenna í hálfmaraþoni á tímanum 1:23:19 sem er hennar besti árangur til þessa.

Við óskum þeim stöllum til hamingju með góðan árangur í hlaupinu.

Það er stórfrétt og mjög gleðileg fyrir Akureyri að stjórn UMFÍ samþykkti á dögunum að Unglingalandsmótið 2015 skyldi haldið á Akureyri og ber UFA ábyrgð á framkvæmd þess. Akureyrarbær stóð að umsókninni ásamt UFA og fór bæjarstjórinn Eiríkur Björn Björgvinsson á stjórnarfund hjá UMFÍ ásamt formanni UFA til að kynna umsóknina og tala fyrir henni. Þetta er í þriðja skiptið sem UFA sækir um að halda mótið.

Það er því ljóst að hér verður mikil og ánægjuleg fjölskyldugleði ríkjandi um verslunarmannahelgina árið 2015, sem vonast er til að allir Akureyringar taki virkan þátt í.