Fréttir

Nýr hlaupahópur á gömlum grunni, tekur til starfa næstkomandi laugardag undir nafninu UFA Eyrarskokk. Hópurinn mun hefja starf sitt með samhlaupi frá Akureyrarsundlaug kl. 10:00 á laugardaginn. Allir eru velkomnir á þessa fyrstu æfingu hópsins. Hlaupið verður í 30–60 mínútur og að því loknu verður hægt að fá nánari upplýsingar um starf hópsins og skrá sig í hann. Við hvetjum alla skokkara og hlaupara bæjarins til að fjölmenna og kynna sér betur það sem verður í boði.

Á mánudaginn hefst svo hlaupanámskeið á vegum UFA Eyrarskokks, sem er tilvalin byrjun fyrir þá sem vilja koma sér í hlaupaform, en treysta sér ekki til að koma beint inn í hópinn. Nánari upplýsingar hér.

Um 350 hlauparar á öllum aldri tóku þátt í 1. maí hlaupi UFA sem fram fór í morgun.

Í skólakeppninni þar sem keppt er um hlutfallslega bestu þátttökuna sigraði Grunnskólinn í Hrísey í flokki fámennra skóla og Giljaskóli í flokki fjölmennra skóla. þessir sömu skólar báru sigur úr bítum í keppninni í fyrra og hefur greinilega skapast sterk hefð fyrir því í þessum skólum að fjölmenna í hlaupið því báðir skólar höfðu yfirburðastöðu gagnvart þeim skólum sem næstir komu.

Í 5 km hlaupi kom Stefán Viðar Sigtryggsson fyrstu í mark á 17:27, annar var Ágúst Bergur Kárason á 18:19 og þriðji var Gísli Einar Árnason á 18:45. Fyrst kvenna var Guðrún Nýbjörg Svanbergsdóttir á 20:59, önnur var Guðrún Arngrímsdóttir á 21:54 og þriðja var Bryndís María Davíðsdóttir á 22:39.

Hér má sjá tíma allra sem hlupu og úrslitin í skólakeppninni.

Að venju mun UFA halda almenningshlaup 1. maí. Líkt og undanfarin ár verður boðið upp á þrjár vegalengdir, 400 m leikskólahlaup fyrir leikskólabörn (fædd 2007 og síðar), 2 km hlaup fyrir grunnskólakrakka og 5 km hlaup með tímatöku fyrir þá krakka sem vilja hlaupa lengra en 2 km og fullorðna. 

Hlaupið er frá Þórsvellinum. Keppni í leikskólahlaupi hefst kl. 12:00, 2 km hlaupi kl. 12:10 og 5 km hlaupi kl. 12:30. Hægt er að forskrá sig í Sportveri milli kl. 14:00 og 18:30 á mánudag og þriðjudag og með því að senda tölvupóst á netfangið ufa@ufa.is. Einnig er hægt að skrá sig í á Þórsvellinum (í félagsheimili Þórs, Hamri) milli kl. 10:00 og 11:30 á keppnisdag. Athugið að við erum ekki með posa svo greiða þarf með peningum.

Nánari upplýsingar um hlaupið má sjá hér.