Fréttir

Bjartmar Örnuson tók þátt í Hellisfjarðarhlaupi sem fram fór í Neskaupsstað um Verslunarmannahelgina. Hellisfjarðarhlaupið er víðavangshlaup þar sem hlaupið er um fjölbreytt land, móa, mýrar, fjörur og tún. Hlaupið hefst í Hellisfirði og endar í Neskaupsstað. Bjartmar hljóp kílómetrana 13 á 59:17 og var steinsnar á undan Vigni Má Lýðssyni sem varð annar á 59:20. Á heimasíðu hlaupsins má fræðast frekar um hlaupið og sjá öll úrslit.

Þriðja og síðasta keppnisdegi Unglingalandsmótsins er lokið og var mótinu slitið nú í kvöld. Þetta var önnur stærsta útihátíðin yfir helgina en ólíkt öðrum hátíðum þá hefur þessi verið blessunarlega laus við vandamál sem virðast fylgja flestum öðrum útihátíðum. Vinsældir mótsins hafa aukist ár frá ári en þetta var í 10. sinn sem mótið var haldið. Á næsta ári verður mótið haldið á Þorlákshöfn og árið 2009 á Grundarfirði.

Úrslitin hjá okkar fólki í dag voru ekki af verri endanum frekar en vanalega.

Ásgerður Jana varð 1. í hástökki og 3. í langstökki í flokki 11 ára stelpna.
Bjarki Kjartansson náði 3. sæti í 60m hlaupi 12 ára stráka.
Elise Marie varð 2. í hástökki 13 ára stelpna.
Agnes Eva varð 3. í langstökki 14 ára stelpna.
Snorri Björn vann 1. sætið í 100m hlaupi og 3. sætið spjótkasti 14 ára stráka.
Kristján Ingi varð 2. í langstökki 17-18 ára stráka.

Boðhlaupsveit 14 ára strákanna okkar náði silfrinu í 4x100m, en í henni voru Snorri, Sindri, Örn Dúi og Hjalti.
Boðhlaupssveit sem Elvar Örn og Kristján voru hluti af, vann flokk 17-18 ára stráka.

Óskum við öllu okkar fólki til hamingju með glæsilegan árangur helgarinnar og vonum af allir hafi skemmt sér vel.