Líkt og hjá flestum íþróttafélögum byggir starf UFA að stórum hluta á starfi sjálfboðaliða. Einu launuðu starfsmenn félagsins eru þjálfarar þess, en annar daglegur rekstur er drifinn áfram með starfi sjálfboðaliða. Öll stjórnarstörf eru unnin í sjálfboðavinnu, mótahald krefst vinnu fjölda sjálfboðaliða sem og önnur verkefni sem félagið tekur að sér í þágu iðkenda sinna. Allt eru þetta skemmtileg og gefandi störf og lítið mál að halda uppi öflugu starfi ef margir hjálpast að.
UFA er félag á hraðri uppleið og iðkendur okkar hafa náð góðum árangri á undanförnum misserum. Ber þar hæst frammúrskarandi árangur Hafdísar Sigurðardóttur og Kolbeins Haðar Gunnarssonar sem bæði eru komin í fremstu röð og farin að fella Íslandsmet í sínum greinum. Fleiri íþróttamenn úr UFA hafa náð góðum árangari að undanförnu og og eigum við til að mynda sex landsliðsmenn í frjálsum íþróttum. Framundan er spennandi vinna við frekari uppbyggingu félagsins og frjálsra íþrótta á Akureyri og hvetjum við þá sem vilja leggja okkur lið til að hafa samband og bjóða fram krafta sína, hvort heldur sem er til smærri verkefna eða tímafrekari og meira krefjandi starfa.
Stjórn
Stjórn UFA sér um daglegan rekstur félagsins og hefur yfirumsjón með öllum málefnum félagsins. Stjórnin er skipuð sjö mönnum til eins árs í senn og fara stjórnarskipti fram á aðalfundi félagsins sem haldinn er í febrúar. Stjórnarstörf í félaginu krefjast engar sérþekkingar, en að sjálfsögðu er æskilegt að stjórnarmenn hafi einhverja þekkingu á frjálsum íþróttum og metnað fyrir hönd félagsins. Nokkrir núverandi stjórnarmanna gefa ekki kost á sér til áframhaldandi setu svo við erum því farin að svipast um eftir nýjum stjórnarmönnum og þiggjum allar ábendingar (og framboð) um efnilega stjórnarmenn.
Nefndir
UFA heldur á ári hverju 4–6 frjálsíþróttamót, þrjú stór almenningshlaup (og nokkur minni) og stendur fyrir fjáröflun fyrir félagið í heild og minni hópa (s.s. söfnun fyrir æfinga- og keppnisferðir). Undirbúningur þessara viðburða er í höndum 3–5 manna nefnda sem starfa í nokkrar vikur eða mánuði eftir umfangi viðburða.
Sjálfboðaliðar
Síðast en ekki síst þurfum við á öflugum hópi sjálfboðaliða að halda sem eru tilbúnir til að vinna á mótum og taka þátt í öðrum verkefnum félagsins. Störf sem krefjast ekki langs undirbúnings eða fundarsetu af fólki heldur tímabundinnar vinnu.
Hikið ekki við að hafa samband og bjóða fram krafta ykkar, eða til að fá nánari upplýsingar. Við bíðum eftir að þið hafið samband.
Í tölvupósti á netfangið: ufa@ufa.is
