Fréttir

Úrslitin í 5 km hlaupinu eru nú komin hér inn á síðuna og þar má sjá röð og tíma allra sem hlupu 5 km. Alls hlupu 120 hlauparar þessa vegalengd og var gaman að sjá hvað hópurinn var fjölbreyttur, ungir og gamlir, af öllum stærðum og gerðum, þeir yngstu 9 ára og sá elsti 74 ára.

Eins og í fjölmörgum öðrum hlaupum UFA á undanförnum árum var það Stefán Viðar Sigtryggsson sem kom fyrstur í mark á tímanum 17:44 í öðru og þriðja sæti í karla voru tveir ungir og efnilegir hlauparar sem báðir eru í Lundarskóla, Ívar Sigurbjörnsson sem hljóp kílómetrana fimm á 18:37 og Bjarki Þór Viðarsson sem hljóp á 19:09. Fyrst kvenna var Rannveig Oddsdóttir á tímanum 18:51, önnur var Sonja Sif Jóhannsdóttir á 21:04 og þriðja var Guðrún Nýbjörg Svanbjörnsdóttir á 23:50.

Þeir sem hafa ábendingar varðandi úrslitin geta komið þeim á framfæri með því að senda póst á netfangið: rannodd@hi.is

1. maí hlaup UFA fór fram í morgun í blíðskaparveðri. Um 400 hlauparar á öllum aldri tóku sprettinn. Leikskólabörnin hlupu 400 m hring á vellinum og grunnskólanemendur og fullorðnir ýmist 2 eða 5 km. Í skólakeppninni bar Giljaskóli sigur úr bítum í flokki fjölmennra skóla með 12,2% þáttöku, Oddeyrarskóli var í öðru sæti með 9,9% þáttöku og Brekkuskóli var í þriðja sæti með 8,9% þáttöku. Í flokki fámennra skóla sigraði Hríseyjarskóli með 83,3% þáttöku, í öðru sæti var Þelamerkurskóli með 47,1% og í þriðja sæti var Valsárskóli með 4,5% þátttöku. Að hlaupi loknu var boðið upp á Pizzur frá Greifanum og Svala og nokkrir heppnir þátttakendur hlutu útdráttarverðlaun frá Sportveri.

Úrslit í 5 km hlaupi verða birt hér á síðunni í kvöld.