UFA Eyrarskokkarar stálu senunni í Laugavegshlaupinu

Norðlenskir hlauparar gerðu það gott í Laugavegshlaupinu sem haldið var síðastliðinn laugardag. Rannveig Oddsdóttir gerði sér lítið fyrir og bætti brautarmet íslenskra kvenna um fimm mínútur þegar hún hljóp kílómetrana 53 á 5:16:11 og Þorbergur Ingi Jónsson var fyrstur karla í mark á 4:10:44 sem er hans þriðji besti tími í hlaupinu. Brautarmet karla og brautarmet íslenskra kvenna eru þar með bæði í höndum UFA Eyrarskokkara.

Alls tók 21 hlaupari úr UFA Eyrarskokki þátt í hlaupinu. Þeir skiluðu sér allir í mark og voru margir meðal fremstu manna. Anna Berglind Pálmadóttir var önnur kvenna á 1:26:28 sem er þriðji besti tími íslenskrar konu frá upphafi og þrjár konur til viðbótar, þær Sonja Sif Jóhannsdóttir, Sigþóra Brynja Kristjánsdóttir og Sigríður Einarsdóttir náðu á pall í sínum aldursflokki. Kvennasveitir UFA Eyrarskokkara náðu auk þess fyrsta og þriðja sæti í sveitakeppni kvennasveita og karlasveit frá UFA Eyrarskokki náði öðru sæti í liðakeppni karlasveita.

Í töflunni hér að neðan má sjá yfirlit yfir árangur UFA Eyrarskokkara. Röð þeirra í mark, tíma og í hvaða sæti þeir voru í heildina, í karla og kvennaflokki og í aldursflokkum. Alls lögðu um 540 hlauparar af stað og skiluðu 506 þeirra sér í mark. Gríðarlega góður árangur hjá okkar fólki sem án efa er afrakstur af því frábæra starfi sem sem UFA Eyrarskokk stendur fyrir.